Nieuws

E soño a kristalisá

KINGSTON – Kòrsou Pabien!!!!! Ata bo selekshon ku a marka historia!!!!! Selekshon di futbòl di Kòrsou a sa di empatá sin gol na Jamaica i asin’ei di forma históriko klasifiká pa Kopa Mundial 2026. Kòrsou ku su 156.000 habitante, a pone rèkert birando e pais di mas chikí ku ta klasifiká pa un Kopa Mundial. Riba e potrèt por mira alegria di  nos muchanan di selekshon den selebrashon despues di e partido.

WILLEMSTAD – Stichting St. Elisabeth Hospital (SEHOS) ta denunsiá ku algun hoben ta drenta e edifisio di hospital “bieu” na Otrobanda, i kometé vandalismo.

E edifisio históriko di SEHOS pa algun luna kaba ta wòrdu vandalisá dor di diferente grupo di hóben destruktivo. Enbes di demostrá respèt pa un edifisio kual ta karga hopi emoshon, i historia pa komunidat, e hóbennan aki ta spùit lemanan mahoso riba muraya, trapa porta i destruí diferente opheto (algun di nan di gran balor). Esakinan ta tuma lugá tantu den siman komo den wikènt.

Pa medio di kámara ku tin den e edifisio, por mira e hóbennan akí  kiko nan ta hasi ku un propiedat di otro hende.

Sinembargo SEHOS no ta laga e destrukshon den e edifisio di hospital bieu keda te aki, i e fundashon ta den preparashon ku outoridatnan, p’asina por atendé ku e personanan responsabel pa e aktonan akí. SEHOS tin algun video i portrèt di e hóbennan akí.

SEHOS ta pidi tur hende si nan rekonosé algun di e hóbennan akí, por fabor tuma kontakto ku e fundashon p’asina nan por responsabilisá nan mes huntu ku nan mayornan.

Willemstad – Sanikolas tabatin su mannan yen ayera, ku vários bishita na diferente krèsh, kaminda ku el a trese regalo i den oranan di anochi a sòru pa regalo prinsipalmente pa  e muchanan ku a pone nan sapatu. Tur aña di nobo Sanikolas ta bishitá Kòrsou i hasi mucha kontentu. Riba e kombinashon di portrèt por haña un impreshon di e tremendo  ambiente di Sanikolas ku su ayudantenan na un di su bishitanan.    

WILLEMSTAD – Tèstmentu di vürwèrk a start ayera. Esaki ta keda hasí semper pa e koperashon entre Brantwer i GMN ku ta tèst vürwèrk nobo pa mira si esakinan ta kuadra ku loke e pèrmit ta preskribí. Ta midi, entre otro, e tempu ku un mecha ta kima promé ku aktivá e vürwèrk, i nan ta evaluá tambe stabilidat di e vürwèrk riba suela. GMN ta midi e parti di zonido pa evitá zonido eksesivo. Tur esaki pa hasi uso di vürwèrk mas seif posibel p’é klientenan ku ta kumpra. Ta konsehá públiko pa semper lesa instrukshon riba e vürwèrk promé ku usa esaki.

WILLEMSTAD –  Un mayoria den Tweede Kamer ta kontra pago di kompensashon (‘herstelbetalingen’) den kuadro di komersio transatlántiko di katibu. Un moshon di parlamentario Joost Eerdmans (JA21) riba e tópiko akí a pasa ku 80 voto pro djamars. Segun e moshon, “ningun  persona ku a sufri daño di komersio transatlántiko di katibu ta na bida  ainda”. Ku e moshon, parlamento ta pidi ku gobièrnu no bai dilanti ku pago di kompensashon. Te ainda koalishon no a reakshoná riba e moshon. E gobièrnu anterior a disidí ku pago di kompensashon. E moshon a risibí sosten di frakshon di PVV, VVD, BBB, CDA, SGP, FvD i JA21.

WILLEMSTAD- Un hóben di 16 aña ta pèrdí for di djaluna atardi. Polis ta pidiendo koperashon di komunidat pa lokalis’é. Ta trata di e hóben Maikel Jose David Stefania, nasé na Korsou di 16 aña. Djaluna 15 di aprel 2024, pa 6’or di atardi e hóben akí a sali for di un instansia kaminda e ta biba i e no a regresá. Maikel tin e siguiente deskripshon: Haltura: 1.60 m – Postura: normal – Forma di kara: rondó – Kabèi: pretu kòrtiku – Koló di wowo: maron skur – Koló di kueru: maron. Na momento ku Maikel a sali bai, e tabatin un T-shirt krèm i un karson hel kòrtiku bistí i un kèts bèrdè na pia. Polis ta supliká tur persona ku por duna kualke informashon tokante di e hóben akí pa tuma kontakto ku polis na number di telefòn  917 òf e number anónimo 108.

WILLEMSTAD – Ayera anochi Instituto Buena Bista (IBB) tabatin un aktividat partikular, kaminda studiantenan tabatin un anochi di presentashon fasinante i humorístiko titulá ‘Kiko Nos Ta Hasi Den Sombra’. Ta trata di un kolekshon di obra di teatro di sombra kòrtiku kreá pa e studiantenan durante un tayer dirigí pa e artista den residensia aktual Charlotte Lagro. E presentashonnan a tuma lugá na Esmeralda, na Galeria di Instituto Buena Bista. Den Kiko Nos Ta Hasi Den Sombra, e studiantenan ta eksplorá diferente senario di enkuentro inkreibel, soño i pesadia, i kiko ta nifiká pa biba huntu. Tabata un anochi realmente interesante.

WILLEMSTAD – Un Kitesurfer ayera a keda heridá na St. Joris, na momentu ku bientu a hasi loke e tabata ke ku su kite. Manera ta konosí, e área di St. Joris akí ta hopi gustá pa e kitesurfernan. Tin hopi bientu, sigur bon bientu pa nan kite por keda bon den laira. Pero e dianan aki tin demasiado bientu. Meteo a manda alerta diferente dia kaba pa laman brutu. I ta importante pa e surfernan di kite tambe tene bon kuenta ku esaki. Den e kaso di ayera e persona a keda bentá pa e kite, pero el a risibí solamente algun raská ounke ambulans a bai kuné tòg pa opservashon.

WILLEMSTAD – Miembronan di selekshon di futbòl tabata di bishita ayera na CMC. 
Esaki kaminda nan a bishitá ayera e departamento hubenil pa kumindá tur mucha ku 
ta sufri di kebrante di salú. Tur esaki ku e meta pa laga e muchanan sera konosí ku 
miembronan di selekshon i duna nan un sonrisa riba nan kara. Huntu ku e staf di CMC i tambe Cliniclowns e miembronan di selekshon a pasa un ratu ameno ku e muchanan den e departamento hubenil.

TIRÁ DEN PIA

WILLEMSTAD – Ayera nochi un hòmber a risibí bala for di arma di kandela na momentu ku e tabata na un snèk den área di Juan Domingo. E balanan a alkansá e víktima parti abou di su kurpa. Pero asina mes e hòmber a sali na kareda pa skapa su bida. Riba Jan Noorduynweg el a kai riba kaya. Ta aki polis i tambe ambulans a presentá pa dun’é asistensia. Riba foto por mira momentu ku ta bai ku e víktima. Polis ta investigando e kaso. 

TREMENDO “PARADA DI ALEGRIA”

WILLEMSTAD –  Den kuadro di selebrashon di Dia Internashonal di Personanan Desabilitá, Krus Kora Kòrsou a organisá “Paranda di Alegria 2022” un biaha mas.  Un biaha mas esnan ku a kore den vehíkulonan grandi a gosa un bòl. Pues otro tremendo edishon di “Parada di Alegria”.

PROBLEMA ENTRE BISIÑA A RESULTÁ DEN DOS DETENSHON

WILLEMSTAD – Un kantidat di patruya a keda dirigí ku urgensia pa Noord Zapateer ayera nochi despues di a risibí informashon, ku lo mester tin un bringamentu formal entre algun bisiña. Ta trata di un problema ku ya tin algun dia tumando lugá i ayera esaki a kulminá den un bringamentu formal. Un di e personanan enbolbí a resultá heridá ku vários kap serio na su brasa, esaki despues ku su agresor a kap e ku machete. Te ku promé ku Extra a bai imprenta, sentral di polis tabata despachando vários patruya pa e sitio atrobe.

HOPI AWA

WILLEMSTAD – Ayera tabata otro dia di yobida fuerte. Práktikamente henter dia. Kuminsando for di oranan di mardugá. Esaki apesar ku ta den rekta final, pa loke ta trata temporada di orkan ku ta finalisá mañan dia 30 di novèmber. Naturalesa tin bia ta kousa problema pero tambe ta sòru pa bistanan bunita. Den e kaso akí nos mester menshoná e kantidat di awa ku ta forma “waterval”. Riba e foto akí por mira den área di Julianadorp kon awa ta kore for di un dam, halando atenshon di hopi hende.

Yena buraku ta aliviá

WILLEMSTAD – E aña akí Kòrsou a haña bastante áwaseru, i ainda aña no a kaba. 
Konsekuensia di esei ta ku hopi di nos kareteranan – ku ya ta den mal estado – ta bira pió. Tin buraku tur kaminda, pero n’e momentunan akí e úniko kos ku por hasi pa aliviá e situashon, ta di tapa/yena e burakunan akí ku asfalt. Sperando ku un dia e kaminda lo haña un bachi mas bunita. No ta e mihó bista, pero ta skapa tayer i piesa bou di hopi outo. Ademas kon ku bai bin, un kantidat di nos hendenan ta kai den trabou pa un periodo. Laga nos demostrá un tiki komprenshon!

KONGESTION RIBA BRÙG

WILLEMSTAD – Un aksidente ku a tuma lugá na bahada di brùg riba Presidente 
Rómulo Betancourt Boulevard direkshon Saliña, tabata motibu pa basta kongestion den tráfiko ayera atardi. Pa motibu ku ainda no ta muchu kla, un vehíkulo a dal den un otro i pone ku ámbos shofùr a pèrdè kontròl riba nan stür i bòltu. Konsekuentemente henter e lado di brùg Juliana kaminda e aksidente a tuma lugá a keda kompletamente blòkiá. Polisnan a presentá na e sitio pa por yuda dirigí tráfiko miéntras ku tabata atendé ku e aksidente.

SIMAN DI KAHA DI ÒRGEL

WILLEMSTAD – Den e fin di siman ku a pasa a tuma lugá riba Plasa Alameda den Punda, e apertura di ‘Siman di Kaha di òrgel’. Un aktividat ku a konta ku presensia di un bon públiko kaminda nan por a disfrutá di e músika di Kaha di òrgel i alabes presensiá demostrashon di baile di diferente skol di baile. Durante e aktividat måinister sr. Sithree van Heydoorn a duna un rekonosementu na sr. Buchi Boekhoudt di hermana isla Aruba pa su esfuersonan inkansabel pa sigui konstruí, konservá i popularisá e músika di Kaha di òrgel riba islanan Aruba, Boneiru i Kòrsou. Riba e potrèt akí por mira Buchi Boekhoudt na man robes durante un di e piesanan.

DIA INTERNASHONAL DI TOLERANSIA

WILLEMSTAD. – Toleransia ta e punto di salida ku nos mester tene na kuenta den desaroyo di un pais. Nos ta bibando den un mundu muchu mas desaroyá kaminda nos tin tur medio na nos alkanse pa komuniká ku otro. Promoshon di solidaridat moral i intelektual ta okupá un lugá sentral den e mandato di UNESCO. Asamblea General di Nashonnan Uní na 1995 a proklamá 16 di novèmber Dia Internashonal di Toleransia. Esaki riba proposishon di Reunion General di UNESCO.

KANAL DEN KAYA

WILLEMSTAD.- Abitantenan den Kaya Bolivar na Souax no sa mas kiko nan tin di hasi pa nan por haña poko yudansa. E kaya no tin solamente buraku pero ta kanalnan ku awa a koba den e kaya, formando peliger pa hende na pia i outomobilistanan. Dor di e áwaseru torensial ku nos tabatin algun dia tras di lomba, e situashon di e kaya akí a empeorá mas. Abitantenan ta pidi ousilio.

BASTA DROGA KONFISKÁ

WILLEMSTAD – Un boto piskadó lokal ku tabata nabegá den nos awanan teritorial a keda interseptá, transportando basta droga ayera.  Wardakosta a interseptá e boto akí den oranan tempran di mèrdia, i a bai mésora na listra i a topa basta droga. Despues ku e outoridatnan a kaba di pisa e droga, a bai ofer na kima esaki mésora. Riba e foto por mira e outoridatnan riba kaminda rumbo pa bai kima e droga.

WILLEMSTAD. – Pa di tantísimo biaha unidatnan di bombero a keda dirigí pa área di Parera pa atendé ku un kandela ku a surgi. Ayera for di distansiananbasta leu por a tuma nota di hopi huma pretu ku tabata bai laira. Hopi tabatapuntra kiko realmente tabata na kandela. Ora ku e promé patruya di polis a yegana e sitio nan a tuma nota ku un biaha mas un kantidat di tayer ta na kandela. Polis ta investigando pa saka afó ken ta responsabel pa esaki.

WILLEMSTAD. – Por poko tabatin un drama ayera ora ku un vehíkulo pa motibunan deskonosí a resultá den e restorant. E promé bista despues di e aksidente a krea un impreshon ku aki ta trata di un desgrasia grave, si tuma nota kon e vehíkulo a drenta i yega na un mesa ku tabata kantu di e muraya di glas. Por mira klaramente ku e outo a drenta yega te kaminda hende lo por tabata sintá. Afortunadamente no tabatin hende sintá na e mesa enkuestion ku awe lo mester a lamentá. Polis a tuma deklarashon di e shofùr ku a splika ku e outo a hasi kos straño i el a resultá den e restorant. E investigashon ta kontinuá.